m'hemmx dubju li se niġi lura
u nkunlek mara oħra
ġismi kisja tartru
taħt difrejja żrar mill-art
għajnejja ġa daħlu f'qoxrithom
f'gerżumti maqbud l-għajjat taċ-ċawl
iżarrat it-tul tal-lejl
hawnhekk twil il-lejl, twil hawnhekk il-lejl
ir-russett jittanta jħares
iqis kull pass li nagħmel ma nafx
jindunax bin-nixfa f’għajnejja
inserraħ ir-rota mal-ħajt ħdejn il-kanal
fejn hemm imħażżeż ismek b'difri
biex ma ninsiex min int min kont mnejn int kif int fejn int
hawnhekk twil il-lejl, twil hawnhekk il-lejl
u qed tara, ma ntbaħtx li r-russett tar
noħroġ mill-but tal-jeans
il-ftit xagħar li ġennibt li nsejjaħlu int
ir-russett jerġa' jitfaċċa minn imkien
iħares fiss f'għajnejja
ma jibżax jersaq biex jinki biex jaħtaf biex jieħu biex jisraq iċarrat inaqqar
hawnhekk twil il-lejl, twil hawnhekk il-lejl
xi darba kien hemm int iġġorni kull fejn tmur kull fejn tista' kull fejn tkun toħodni kull fejn ifakkrek fija u fik u fina kull fejn dħaqna kull fejn bkejt għalik jew int għalija kull fejn ħallejn'isimna warajna kull fejn blajna l-egżost f'kull post fejn drajna x-xemx fejn ħadna kafè kull post fejn ħallejna biċċa minna kull marka kull farka kull fejn blajna l-baħar u togħmnieh kważi ħelu u mbagħad mielaħ u mbagħad morr kull fejn intlaqna fuq ir-ramel kull fejn irqadna fuq il-blat kull post li fih tħanżirna kull post li tqalna li żvujtana kull post li ħaffifna li saħħanna kull post li fih irżaħna tiftakar darba xtrajtlek xalla u wegħedtni li żgur żgur iġġorrni miegħek kull fejn tmur?
hawnhekk twil il-lejl, twil hawnhekk il-lejl
naħseb li darba xtrajtlek xalla
imm'issa nsejt jekk, fuq kollox, kontx tajthielek
u xi ħaġa fija laħqet mietet
dan l-aħħar ittraduċejt is-silenzju
ma nafx fhimtux sewwa
għax ix-xita, hawn
dejjem
nieżla